M&M LOVERS

Hver elskar ekki m&m ég bara spyr??? 

Snilld í barna afmæli þar sem börnin hafa svo gaman af þessum litríku litlu súkkulaðikúlum sem bráðna í minninum á manni ....NAMM!

Ég væri alveg til í að það myndi rigna m&m af og til, just saying!

m&m bollakökur

Gerir u.þ.b  24 stk. en ef þið notið þessi hvítu litlu þá verða þær u.þ.b. 30-34 stk.

Stillið ofninn á 180 gráður. Undirbúningstími 20 mínútur, bökunartími 20 mínútur.

Innihald

340 g hveiti

3 tsk. lyftiduft

½ tsk salt

170 g smjör við stofuhita

375 g sykur

3 egg

2½ tsk vanilludropar

280 ml mjólk

100 g m&m, annað hvort heil eða skorin gróft.

Aðferð:

1. Raðið bollakökuformunum á bökunarplötu.
2. Hrærið smjör og sykur vel saman þangað til blandan verður ljós og létt.
3. Bætið einu og einu eggi saman við og hrærið vel á milli, bætið svo vanilludropum saman við.
4. Blandið hveitiblöndunni varlega saman við ásamt mjólkinni, setjið smá af hvoru tveggja og hrærið á milli.
5. Bætið m&m saman við og hrærið með sleif.
6. Setjið deigið í formin og passið að fylla þau ekki meira en 2/3. Bakið í u.þ.b. 20 mínútur. eða þar til kökurnar eru orðnar gylltar að lit.

Krem

250 g smjör við stofuhita

500 g flórsykur

3 tsk. vanilludropar

50 ml. rjómi

80 g. m&m skorin smátt (einnig gott að setja í matvinnsluvél)

1. Hrærið smjörið þangað til það er orðið mjúkt og fínt.
2. Bætið smá og smá af flórsykri saman við og hrærið vel á milli.
3. Bætið saman við vanilludropum og rjóma og hrærið vel.
4. Bætið saman við m&m bitunum.

Þegar kökurnar hafa verið kældar þá setji þið kremið á, mér fannst koma best út  með þetta krem að setja eina matskeið ofan á hverja köku og skreyta með m&m, en hægt er að sprauta því á kökurnar af vild.

Verði ykkur að góðu

Thelma

DRAUMUR Í DÓS!

Það er hollt að láta sig dreyma... :) 

Kveðja 

Thelma

Barna afmæli

Þessi litli englabossi hennar mömmu sín verður 4 ára núna í febrúar. Ég er eitthvað voðalega að vandræðast með hvaða þema ég á að hafa í afmælinu hans, yfirleitt er ég búin að plana það með miklum fyrirvara og föndra og skreyta fyrirfram, en ég er einhvern vegin ekki að komast í gang núna. Öll ráð vel þegin???

Hérna er afmæliskakan hans síðan í fyrra, mun einfaldari en hún lítur út fyrir að vera!

Ég er búin að vera skoða á netinu  og leita að hugmyndum og fann þessa snilldar hugmynd af köku af Gamla gamla eins og Kristófer kallar hann, eða gamla krók eins og hann heitir í raun, algjör snilld frá Bakerella fyrir ykkur sem eigið börn sem halda upp á cars.

Hérna eru ítarlegar leiðbeiningar hvernig á að gera þessa flottu köku! það  má einnig finna fullt af fleiri flottum hugmyndm og uppskriftum á þessar síðu. 

Kveðja 

Thelma

Súkkulaði og pecanhnetu ískaka með karamellu

Þessa uppskrift var ég með í hátíðarmatarblaði Vikunnar sem kom út í nóvember. Þessi ísterta var eftirréttur fjölskyldunnar á aðfangadag, hún er unaðslega góð, einföld og fljótleg! (fyrir utan 5 tíma í frysti!!)

Til að fá hana sem fallegasta í laginu er best að nota meðalstórt hringlaga smelluform því þá er svo auðvelt að taka kökuna úr forminu og færa yfir á fallegan disk sem þú vilt bera hana fram á. Best er að láta kökuna þiðna örlítið, samt ekki of lengi, setja beittan hníf undir botninn þannig að kakan verði laus og vippa henni svo yfir á disk. Svo er bara hægt að láta hugmyndunaraflið fara af stað hvað varðar skreytingar ofan á. Auðvelt er t.d. að skrifa nafn á kökuna með karamellusósunni (best að setja hana aðeins í heitt vatn áður) ef t.d. á að bera fram sem afmælisköku.

Tips frá Mr. Handsome: gott að borða með slatta af þeyttum rjóma!

Súkkulaði og pecanhnetu ísterta

6 egg

6 msk. sykur

100 gr. bráðið mars með 5 msk. rjóma

7 dl. rjómi

2 tsk. vanilludropar

150 gr. suðusúkkulaði dökkt/ljóst eftir smekk skorið niður í litla bita.

100 gr. H- Berg pecanhnetur skornar mjög smátt.

100 gr. H-Berg heslihnetur hakkaðar

60 gr. karamellusíróp og aðeins meira til skrauts (ég notaði karamellusósu Rikku)

Þeytið eggjarauðurnar saman við sykurinn þangað til blandan er orðin ljós og létt, hellið svo bráðnuðu marsi saman við. Þeytið síðan rjómann og blandið honum varlega saman við blönduna, ásamt súkkulaðinu, pecanhnetunum og vanilludropunum. Stífþeytið því næst eggjahvíturnar og blandið þeim varlega saman við allt saman. Settu hakkaðar heslihnetur í botninn á meðalstóru kökuformi, heltu svo blöndunni yfir, heltu karamellusírópinu yfir og blandaðu því saman við með því að snúa hníf í nokkrar hringi í gegnum ísinn, passaðu þig að fara ekki of nálægt botninum til að fara ekki í hneturnar í botninum. Frystu í lágmark 5 klst. Þegar ísinn er orðinn vel frosinn er hann tekinn úr kökuforminu og settur á disk, raðaðu pekanhnetunum ofan á og skreyttu með karamellusírópi.

Verði ykkur að góðu!

Thelma

Súkkulaðibitaköku Brownie

Dagur elskenda er á næsta leiti, 14. febrúar, eða Valentínusardagurinn eins og hann er kallaður. Valentínusardagurinn er amerískur siður en við Íslendingar höfum verið að taka upp þá hefð að fagna honum okkur konunum til mikillar ánægju, þar sem konudagurinn er svo rétt á eftir og því má segja að febrúarmánuður sé algjör dekurmánuður okkar kvenna. Allavega er ég alsæl með þetta fyrir komulag og þetta gefur okkur enn eina ástæðuna til þess að gera eitthvað “sérstakt” saman og brjóta upp vikuna. Ekki veitir af í þessu skammdegi sem við búum við hér á landi sem mér finnst búið að hafa óvenjulega mikil áhrif á mig í þessum dimma janúarmánuði! hvað með ykkur???

 Mér finnst þó þessi dagur ekki aðeins fyrir elskendur heldur horfi ég á þetta sem dag til þess að njóta sín með einhverjum sem manni þykir vænt um, eins og góðum vin, foreldri eða ættingja. 

En ég held ég geti talað fyrir flestar konur að smá "treat" í miðri viku er aldrei leiðinlegt! það þarf þó ekki að vera mikið og því er þessi póstur handa ykkur karlmönnunum! hint, hint.... 

Þessi kaka er sjúklega góð! og það besta við hana er hversu einföld hún er og að allir ættu að geta bakað hana. Hugsið um þetta sem greiða frá mér til ykkar, því ég veit að þið fáið þetta launað einhvernvegin :) 

Yummy!!

Innihald

 1 pakki Betty Chocolate Chip Cookie Mix

1 pakki Betty Brownie Mix

Aðferð

Blandið hvort mixið fyrir sig eftir leiðbeiningum á pakkanum. Settu Brownie mixið í eldfast ferkantað mót (eða hvaða mót sem er) Blandaðu því næst Chocolate Chip Cookie mixið saman eftir leiðbeiningum á pakkanum og settu eina matskeið hér og þar yfir Brownie mixið.

Bakið í 20-25 mín eða þar til prjónn kemur næstum því hreinn upp úr kökunni

Súkkulaði 

115 g súkkulaði

1 dl. rjómi

2 msk. hunang

2 msk. síróp

1 tsk. vanilludropar

Þegar kakan hefur náð að kólna helliru brædda súkkulaðinu yfir kökuna og setur inn í ísskáp í 30 mín. til þess að leifa súkkulaðinu aðeins að storkna áður en þú skerð kökuna í bita.

Ef þið leggið í þessa köku þá megið þið endilega kommenta hér að neðan og segja mér hernig gekk! :)

p.s. Mr. Handsome fannst þessi svo góð að hann tímdi ekki að fara með hana í vinnuna til að deila með sér!

Verði ykkur að góðu!

Thelma

Bollaköku og kökuskreytingar námskeið

Tilvalið fyrir vinkonuhópinn eða saumaklúbbinn að skella sér

 á bollakökunámskeið og/eða kökuskreytingarnámskeið í

 persónulegu  og hlýlegu umhverfi. Ég legg mikið upp úr 

einfaldleika svo allir ættu að geta lært að nýta sér einfalda en 

jafnframt fallega tækni.

það eru ekki skilyrði að koma í hóp.

Ef þið hafið áhuga vinsamlegast hafið samband í gegnum

 netfangið thelma.thorbergs@gmail.com 

Súkkulaðimess með sykurpúðum og pecan hnetum

Oh My! þessar bollakökur eru sannkallaðar kaloríubomur, en hverjum er ekki sama??? Ég skal lofa því að hver munnbiti er algjörlega þess virði. Þessar eru flottar á borði við hvaða tækifæri sem er og maður getur leikið sér aðeins af því hvernig maður vill bera þær fram eða skreyta.

Þær eru alveg tilvaldar í barnaafmæli þar sem mörgum börnum finnast sykurpúðar hið mesta lostæti!

SúkkulaðiMess!

Innihald

156 gr. hveiti

½ tsk. Matarsódi

¼ tsk. Salt

120 gr. smjör við stofuhita

280 gr. sykur

2 egg

2 tsk. Vanilludropar

180 ml. Mjólk

60 gr. dökkt kakó

1. Stilltu ofninn á 180°C hita og raðaðu ca. 20 bollakökuformum á ofnplötu

  2. Blandaðu saman hveiti, matarsóda og salti í skál og settu til hliðar.

   3Hrærðu smjörið þangað til það er orðið mjúkt bættu svo sykrinum saman við og hrærðu á meðal hraða saman. Bættu eggjunum saman við einu í einu og hrærðu vel saman.

4.       Blandaðu vanilludropunum og mjólkinni saman í bolla.

5.   Blandaðu hveitiblöndunni og mjólkurblöndunni saman við til skiptist, smá og smá í einu og hrærðu vel á milli. Skafðu skálina vel að inna og hrærðu örlítið lengur til þess að blanda öllu vel saman.

6.       Bættu kakóinu saman við og hrærðu vel saman á lágum hraða.

7.       Settu deigið í bollakökuformi og reyndu að fylla þau ekki meira en 2/3. Bakið í ca. 20 mín.

8.       Kældu kökurnar alveg áður en þú setur kremið á.

Súkkulaði-rjómaostakrem

60 gr. smjör við stofuhita

250 gr. rjómaostur við stofuhita

500 gr. flórsykur

1 – 2 tsk. Vanilludropar

200 gr. bráðið súkkulaði

1 msk. dökkt kakó

Til skrauts

100 gr. síðusúkkulaði

40 gr. smjör

1.       Hrærðu smjörið og rjómaostinn saman þangað til blandan verður mjúk.

2.       Bættu flórsykrinum saman við jafnt og þétt og hrærðu vel á milli. Bættu við vanilludropunum.

3.       Blandaðu saman við brædda súkkulaðinu og kakóinu og hrærðu vel. Skafðu hliðar skálarinnar vel og hrærðu í ca. 2 mín.

4.       Sprautaðu kreminu á kældar kökurnar, skreyttu með mini-sykurpúðum, bræddu saman suðusúkkulaði og smjör saman og heltu yfir sykurpúðana, skreyttu með skornum pecanhnetum.

Þessi uppskrift er einnig á heimasíðu gott í mattinn og þar er auðvelt að láta síðuna reikna út fyrir sig aukið magn, t.d. ef þú vilt tvöfalda eða þrefalda uppskriftina. 

Munið að með allar bollaköku uppskriftir er einnig hægt að gera kökur og þá er yfirleitt nóg deig í 2 meðalstór form og svo er kreminu skellt á milli og ofan á og skreytt af vild :)

Verði ykkur að góðu!

Kveðja

Thelma

Epla og karamellu bollakökur

 

Uppskriftin af þessum unaðslegu bollakökum birtist í jólablaði Home & Delicious. Það er eitthvað við epli og kanil sem minnir mig svo á jólin og ég tala nú ekki um lyktina sem angar um húsið þegar þær töfrast í ofninum! Rjómaostakremið er svo fullkomið á móti sæta bragðinu af kökunum og karamellunni og tilvalið er að skreyta þær með hökkuðum heslihnetum eða súkkulaðispænum.

 

Þessar bollakökur henta þó við hvaða tækifæri sem er! Hvet ykkur einnig að kíkja á Home & Delicious blaðið þið sem hafið ekki gert það nú þegar, alltaf gott að detta inn í draumaheim á netinu af og til með góða bollaköku við hönd.

 

 

 

Mynd eftir Gunnar Sverrisson

 

Epla og karamellu bollakökur

Kökur innihald

 

475 g hveiti

3 tsk. lyftiduft

½ tsk maldon salt

225 g smjör við stofuhita

400 g sykur

4 stk egg við stofuhita

80 ml heitt vatn

4 stk meðalstór epli rifin niður

2 tsk kanill

 

Vanillu rjómaostakrem innihald

60 g smjör við stofuhita

500 g flórsykur

1 tsk. vanilludropar (1-2 tsk)

180 g rjómaostur við stofuhita

 

Karamella innihald

200 g sykur

6 msk. smjör

1 dl. rjómi við stofuhita

 

 

Kökur aðferð:

1. Hitið ofninn í 180 gráður og raðaðu formum á bakka.
2. Blandaðu saman hveiti, lyftidufti, kanil og salti í skál.
3. Settu smjörið í skál og hrærðu þar til smjörið verður mjúkt og fínt, bættu því næst sykrinum saman við og hrærðu vel saman í u.þ.b. 3 mínútur.
4. Bættu einu eggi saman við í einu og hrærðu vel á milli.
5. Bættu svo við smá af hveitiblöndunni og smá af heita vatninu saman við og hrærið á litlum hraða og bætið svo restinni saman við. Það er mikilvægt að blanda hveitinu og vatninu smá og smá saman við svo að það sé ekki of mikið álag á deiginu, þá getur það orðið seigt.
6. Blandaðu rifnu eplunum saman við varlega með sleif.
7. Settu deigið í formin og fylltu þau u.þ.b. 2/3.
8. Bakaðu kökurnar í u.þ.b. 18-22 mínútur.
9. Kældu kökurnar í u.þ.b. 20 mínútur, eftir að þú tekur þær úr ofninum.
10. Skerðu innan úr miðjunni á hverri köku til þess að fylla hana af karamellu.

Vanillu rjómaostakrem aðferð:

Settu allt saman í skál og hrærðu þar til blandan verður mjúk og létt. Gott er að hræra á miklum hraða síðustu 2 mínúturnar.

 Karamella aðferð:

1. Setjið sykurinn í pott undir meðalháan hita og hrærið vel í þangað til hann er vel bráðnaður og orðin örlítið dökkur.
2. Bætið smjörinu saman við og hrærið vel.
3. Takið af hellunni og bætið rjómanum saman við og hrærið þangað til blandan er orðin mjúk og fín. Kælið inn í ísskáp í u.þ.b. 15 mínútur.
4. Sprautið svo karamellunni ofan í hverja bollaköku fyrir sig, setjið kremið á og skreytið með restinni af karamellunni.

 

Verði ykkur að góðu!

 

Thelma

Bananabrauð með súkkulaði

Bananabrauð með súkkulaði!

 

 

 

Þetta bananabrauð svíkur engann!! það er mjög einfalt og fljótlegt, fyrir utan að það þarf að vera í ofninum í rúma klst. en ég skal lofa ykkur því að það er svooooo þess virði! Því ég bætti smá súkkulaði saman við, já súkkulaði gerir nefnilega kraftaverk, bæði fyrir braðlaukana og sálina!

 

 

 

 

 Innihald:
125 g smjör við stofuhita
175 g púðursykur, dökkur
2 egg
3 bananar (gott að hafa þá brúna)
100 g dökkt súkkulaði
250 g hveiti
½ tsk. sjávarsalt
2 tsk. lyftiduft
1 kúfuð tsk. kanill
 

Aðferð
Hrærið smjöri og sykri saman þangað til það hefur blandast vel saman. Setjið eitt egg í einu og hrærið á milli. Stappið bananana og bætið þeim saman við, hrærið. Blandið saman þurrefnunum og hrærið vel. Því næst setjið þið súkkulaðið saman við, grófsaxað. Smyrjið 1 lítra brauðform eða setjið bökunarpappír ofan í og hellið deiginu í. Bakið í u.þ.b. 1 klst. við 175 gráður.
 

Gott er að borða brauðið með osti og smjöri eða að hætti Mr. Handsome, með heimatilbúnu möndlu- og hnetusmjöri sem hann útbjó sjálfur! Hver veit nema að hann deili því með ykkur fljótlega.
 

 

Ég er einnig að blogga reglulega fyrir www.gottimatinn.is endilega kíkið við á nýjasta bloggið frá mér þar sem ég deili með ykkur uppskrift af M&M bollakökum sem eru tilvaldar í barnaafmælið eða við hvaða tækifæri sem er :)

 

http://www.gottimatinn.is/matarblog/thelma-thorbergsdottir/bananabraud-og-bollakokur/21

 

 

Kveðja

 

Thelma

 

 

 

 

 

 

 

 

 

Nýtt Blogg!

 

Jæja þetta hafðist! náði loksins að klára bloggið mitt svona að mestu leiti, verð klárari í þessu með hverjum deginum (ætla að trúa því). En hér ætla ég að deila með ykkur gómsætum uppskriftum, bæði uppskriftum frá mér sjálfri og uppskriftum sem ég hef prófað frá öðrum matarbloggurum og úr uppskriftarbókum.

 

Ætla að byrja fyrsta bloggið á þessar Rolo tertu, hún er í  miklu uppáhaldi hjá mörgum mínum vinum og þá sérstaklega hjá Mr.Handsome!

 

Það væri gaman að fá comment frá ykkur, bara um hitt og þetta og ef þið hafið prófað eitthvað af uppskriftunum hvernig ykkur fannst þær smakkast. Það hvetur mann áfram að prófa nýja hluti að fá comment frá ykkur og gaman að vita það að einhverjir aðrir njóta þess sem þú gerir.

 

Njótið

 

 

 

 

Innihald

330 g sykur

250 g hveiti

1 tsk. lyftiduft

215 g smjör

3 stk egg

3 tsk. vanilludropar

1 ds af sýrðum rjóma

½ tsk salt

60 g dökkt kakó

1 pk. súkkulaðibúðingur (óblandaður)

180 ml heitt vatn

24 stk. frosnir rolobitar (þarf að frysta í lágmark 2 klst. má sleppa)

 

Karamellu smjörkrem

450 g smjör við stofuhita

2 tsk vanilludropar

¼ tsk sjávarsalt fínmalað

340 g flórsykur

• karamellusíróp (1/3 bolli)

 

 

Súkkulaðigljái innihald

115 g súkkulaði

1 dl. rjómi

2 msk. hunang

2 msk. síróp

1 tsk. vanilludropar

 

Aðferð:

1. Hitaðu ofninn í 180 gráður og smurðu 2 meðalstór eldföst mót.
2. Blandaðu kakóinu og heita vatninu saman í skál, bættu svo við sýrða rjómanum og láttu kólna.
3. Blandaðu saman hveitinu, lyftiduftinu og saltinu saman og settu til hliðar.
4. Hrærðu smjörið og sykurinn saman þangað til blandan verður ljós og létt. Bættu saman við eggjunum einu í einu og hrærðu vel á milli. Bættu vanilludropunum saman við. Skafðu hliðarnar á skálinni vel á milli.
5. Bættu saman við hveitiblöndunni, súkkulaðibúðingnum og kakóinu saman við smá og smá í einu af hvoru um sig og hrærðu saman á litlum hraða þangað til öllu hefur verið blandað saman.
6. Skiptið deginu á milli formanna. Setjið nokkur frosin rolo í deigið og ýtið því örlítið niður, ekki alveg ofan í botn samt því þá vill það til að festast þar við. Bakið í ca. 20 mín. eða þar til prjónn kemur hreinn upp úr  miðju kökunnar.

Karamellu smjörkrem aðferð:

1. Hrærðu smjörið þangað til það verður mjúkt, bættu svo vanilludropum og karamellu sýropinu saman við og hrærðu vel saman.
2. Blandaðu flórsykrinum varlega saman við smá og smá í einu og hrærðu vel á milli. Ef þú villt þykkja kremið getur þú bætt aðeins af flórsyrki saman við, ef þér finnst kremið of þykkt getur þú bætt smá mjólk saman við.
3. Setjið kremið á milli botnanna og smyrjið kreminu svo á kökuna, gott að geyma smá krem til að skreyta ofan á kökuna. Fyrir þá sem vilja setja súkkulaðigljáa ofan á kremið er uppskrift og leiðbeiningar hér að neðan. Flott að skreyta með rolo bitum í lokin.

Súkkulaðigljái aðferð:

1. Hitaðu rjómann í litlu potti yfir meðal háum hita þangað til hann verður mjög heitur, passa þarf þó að rjóminn sjóði ekki.
2. Brytjaðu súkkulaðið í bita og settu í skál. Heltu rjómanum yfir súkkulaðið og leyfðu rjómanum að bræða súkkulaðið. Það tekur rúmar 5 mín. fyrir súkkulaðið að bráðna, hrærið svo vel saman.
3. Bættu hunangi, sýropi og vanilludropum saman við. Kældu gljáann í rúmar 15. mín svo hann bræði ekki smjörkremið þegar honum er helt yfir. Mikilvægt er þó að passa að gljáinn nái ekki að harðna því þá er ekki hægt að nota hann ofan á kökurnar.
4. Súkkulaðigljáinn þarf að kólna og þykkna áður en þú hellir honum yfir kökuna, gott er að byrja á því að gera hann og setja hann aðeins inn í ísskáp. Síðan er honum hellt yfir kökuna, hann rennur vel niður svo farið varlega að setja ekki of mikið.



 Verði ykkur að góðu

 

Kveðja

Thelma